Plantun de Prouvènço

Pèr coumpara dos planto d'encò nostre

Carex nigra & Scleranthus annuus

Queirello(-negro)

Carex nigra

Cyperaceae

Àutri noum : Moutouso, Sagneto.

Noms en français : Laîche noire, Laîche brune.

Descripcioun :
Queirello coumuno subretout en mountagno dins li relarg umide e bagna. Fai de fiéu (estouloun) dins la terro. A, en generau, un espiguet mascle en aut de l'enflourejado, e de dous à quatre espiguet femelo en dessouto. Aquéli porton de flour emé dous estigmate e d'escaumo bèn nego d'ounte ressort uno grosso costo verdo. Coumpara emé la queirello-auto que ié sèmblo proun, mai rèsto pulèu en basso Prouvènço.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 5 à 60 cm
Fueio : costo paralèlo
Tipe bioulougico : Emicriptoufite
Cicle bioulougico : Planto renadivo

Gènre : Carex
Famiho : Cyperaceae

Ordre : Poales

Coulour de la flour : Negro
Petalo : ges
Ø (o loungour) enflourejado : 5 à 8 cm
Flourido : Estiéu

Sòu : Ca
Autour basso e auto : Pancaro entresigna
Aparado : Noun

Liò : Palun tourbous - Mueio - Prado umido - Bas-palun
Estànci : Subremediterran à Aupen
Couroulougi : Subrecousmoupoulito
Ref. sc. : Carex nigra (L.) Reichard, 1778

Gnavello(-de-l'an)

Scleranthus annuus

Caryophyllaceae

Nom en français : Gnavelle annuelle.

Descripcioun :
Aquelo planto, proun ramificado, se tirasso sus la sablo e lis endré trepeja. Sus si tijo se podon vèire uno à dos bando de péu crespu. Li fueio soun redo e en long. Li flour, verdo, soun pas bèn grosso e fan d'enflourejado agroumelado. La subsp. presentado eici, emé de flour gaire duberto e que trachis dins li mitan primàri, ié dison polycarpos. Coumpara emé la gnavello-renadivo.

Usanço :
Fai partido dóu group (38 meno) de flour dicho "de Bach". Ramenten que lou mege, Dr Edward Bach (1886-1936), adoubè de poutingo de flour que dèvon "armounisa l'equilibre epsichique de la persouno". La gnavello permetrié de prendre de decisioun. En Poulougno, au siècle passa s'acampavo li babo de vermèu (Coccus Polonicus) que reston sus li racino pèr n'en faire un coulourant rouge.